(आदरणीय सौमित्र यांची साभार क्षमा मागून "पावसा"ची जागा "चहा"साठी वापरत आहे.)
त्याला चहा आवडत नाही,
तिला चहा आवडतो.
चहाची वेळ झाल्यावर तो
तिच्या तावडीत सापडतो.
"मी तुला आवडते, पण चहा आवडत नाही
असलं तुझं गणित खरंच मला कळत नाही.
चहा म्हणजे पित्ताला कार, चहा म्हणजे जळजळ
चहा थकल्या जीवाला उभारी, चहा ताजा दरवळ.
चहा उष्णता वाढवतो, चहा वैतागवाडी
चहा डोक्याच्या तापातून मुक्ती, चहा अमृताची गोडी.
चहा टवाळकीची कामं, चहा म्हणजे टाईमपास उगाच
चहासोबत एकजीव होऊन मनाला येतो उत्साह खास."
दररोज चहाची वेळ येते, दररोज असं होतं,
चहावरून भांडण होऊन लोकांमध्ये हसं होतं.
चहा आवडत नसला तरी, ती त्याला आवडते
चहासकट आवडावी ती, म्हणून ती ही झगडते.
रुसून मग ती खटटू होते, हरवते वाफाळत्या चहात
त्याचं तिचं भांडण रोज कपभर चहाच्या मोहात.
- चहाप्रेमी,
सोनल
